Dhabcaal wadaad
Wadaaddada dhabcaal baa ku jira, dhiibin waanada e
Dhabta sheegi maayee adduun, buu dhacsanayaa e
Maantii run laga dhawrayuu, dhega la’aadaa e
Muuqaal dhukuba weeye oon, dhimanna noolayne
Waa nimuu hunguri dhaamayoo, dhiriqda yaallaa e
Waa dhaqan yahuudoobeyoo, dhuunta baw darane
Dhiisha kama u weyniyo wuxuu, dhugux ka siiyaa e
Islaamnimo dhabnimadeeda buu, dhamacyo saaraa e
Caammada dhabbaha seegtay buu, daba dhugleeyaa e
Dhinacay rabaan buu cilmiga, ugu dhaqaajaa e
Shirkiguu ka dhigayaa sidii, dhayda iyo xoore
Dhunkaal lagu sumoobaayo buu, dhama yiraahdaa e
Ammaanadi Ilaah dhawra yiri, meel xun buu dhigaye
Dhexduu uga jiraa abid waxay, dhabaqsanaayaane
Dhaqan lagu cadaab mudanhayuu, dhiirri geliyaa e
Dhabbe toosan buu oran hadday, naar ku dhacayaane
Baraa’aduna waw dhimasho iyo, hoog u dhalandhoole
U dhaqaaqi maayoo bulshada, baysku dhacayaane
Dhibta buu ogyahay iyo waxay, dhali karaysaaye
Dhaldhalaal inuu tegahayoon, dheregi joogeyne
Dhab ninkii u eeg eega oo, dhuuxa hadalkiisa
Dheelligu u muuqanahayuu, dhirif ka qaadaa e
Dood loo dhib geliyana ha filin, inay dhammaataa e
Runba lagama dhawroo wuxuu, dhurayo waa beene
Dhabbeyaal is googooya buu, kaa dhex gelayaa e
Dhankaa buu jiraa maalin baad, dhihiba weydaa e
Naskuu soo dhuftana waa miduu, kugu dhakraayaa e
Iska dhici rag mooyee wax kale, lama dhawaaqaayo
Xujaduna nin dhawrsanahayay, dhicin karaysaaye
Ma dhurwaa dhac laga waaniyaa, dhaqanki toosaa e
Dhadhaab lala hadlaa waa waqtiga, dhimashadiisii e
Dhagax yaa la sheekaysan jirey, dhegaba loo yeelin
Dhaayo looma yeeshoo nafluhu, dhuganba maayaane
Illeen dhagar wadaad lama gartiyo, shiikha dheelliya e
Caamma dhega ballaarey maxaa, lagugu dheeldheelay
Maxaad dhacan tihiin waydinnaan, dheefta garanayne
___________________