Eed maleh qabiil
In qabiil la sheegtaba dad baa, qoonsadoo naca e
Qaab darriyo waxay moodayaan, qool cadaawa ahe
Bulshadoo la kala qaybiyiyo, qaran wadkiisii e
Oo aan qiil dhigaayiyo daliil, qiraya loo hayne
Jahli aan qalbiga laga inkirin, baa ka qaaliba e
Qur’aankiyo ma eegaan sunnadu, tay qarrirayaane
Qiyaastuna waxay kaa riddaa, qar iyo buur dheere
Haddii ay cilmiga qabanayaan, qalad ma keeneenel
Haddii ay qallooc tahay nabigu, qolo ma sheegteene
Qoyska Haashim iyo lama maqleen, cido qureysheede
Qur’aan kama qiseeyeen wixii, qooman soo jireye
Qabiilada thamuud amase caad, kuma qorraadeene
Qaran iyo qabiil oo dhan waa, qoys yaroo fidaye
Waa qaraabo kulligood dhashii, Aadam baw qorane
Rabbi baw qaddaray inay noqdaan, beelo qaybsama e
Iyo qaabab kala jaada oon, isku qasnaanayne
Dadka quban adduunyada haddaan, qooman laga yeelin
Haduu qawl midaynaaya oo, qura ku sheekaysto
Oo aan midabka loo kala qayirin, qaaradaha yaalla
Qof kaa lumay inaad qabato waa, quusashiyo daale
Sharaf baa u qoran aadmigoo, qayrki laga soocye
Waase qiima beelaa markuu, Qaaddir caasiyo e
Xoolahaa ka qolo roon markaan, diini qabanayne
Qab weynida ku faan iyo markuu, kibirku qaadaa e
Wax walbaa qarriban diin haddii, laga qatoobaa e
Eed ma leh qabiilkuye dadkuu, qiimahood dhacaye
Qabyaalidi xumaa maalintii, laysku quursado e
Daallimiinna qiil looga dhigo, waa qaraabada e
Soomaali waxa qaybiyoo, qixiyeyoo laayey
Qabiil maaha ee waa Islaam, ay ka qadayeene
Kitaabkay qarsheen iyo xaqay, qiima dilayeene
Qisaas baa haleeshiyo Ilaah, qabashadiisii e
Eelkii qabsaday iyo kufriga, qaranka aafeeyey
Rag baa wali u qiiraysanoo, diinta qoonsada e
Qur’aan diidyadii baa talada, loo qodbahayaa e
Qalbi laaweyaalow mindhaa, kuma qabowdaane
……………………..
Tusmo